Single Leg Amputee Sports Club (SLASC)
Pep BONET
Colonia de Sant Jordi, Mallorca, 1974
Aos 15 anos trasladouse a Tarifa para estudar bacharelato e dedicarse ao windsurf. En 1995 residiu durante tres meses en Hawai, practicando o windsurf, deporte co que chegou a competir no campionato do mundo. Dous anos máis tarde, instalouse en Amsterdam e estudou fotografía, á que decidiu dedicarse profesionalmente tras visitar unha exposición de Ed van der Elsken. Foi seleccionado polo World Press Photo Masterclass (2002), para menores de 30 anos, polo seu traballo «Faith» realizado en Serra Leona. A revista PDN Photo Anual de Nova York seleccionouno como un dos «30 novos talentos do ano» (2002) e o festival PhotoEspaña escolleuno na sección «Descubrimentos» (2002). Gañou o premio Kodak Young Photographer of the Year (2003). Con «Blind Faith» obtivo o premio FotoPres‘03 e o primeiro premio Fujifilm Europress (2003) na categoría de retrato. Gañou o primeiro premio Zilveren Camera Holland na categoría de documental internacional (2003). O mesmo ano expuxo «Faith in Chaos» no Festival Internacional de Xixón. En 2004 foi seleccionado como finalista na bolsa W. Eugene Smith en fotografía humanística, que gañou o ano seguinte (2005). A Fondazione Luchetta de Trieste nomeouno mellor fotógrafo de prensa (2004). Expuxo en numerosos países. Publicou na editorial Rozenberg o libro Posithiv+ (2005). En 2006, tras uns anos en Amsterdam, trasladou o seu estudio a Santanyí (Mallorca). Por quinta vez viaxou a Serra Leona para documentar a posguerra do país. Presentou «Warriors Somalia» no Encontro Internacional de Fotoxornalismo en Xixón (2006). En 2007 gañou o segundo premio World Press Photo, na categoría de serie de deportes, cunha reportaxe sobre unha liga de fútbol de amputados en Serra Leona; e o terceiro premio en FotoPres’07.
Exposición: FOTOPRES’07
|