O Outono Fotográfico sitúa Finis Terre en Compostela
O festival internacional de fotografía leva á galería Sargadelos de Santiago o traballo de Marta Moreiras.
O segundo andar da mítica sala da rúa Nova compostelá exporá Finis Terre, un traballo da fotógrafa Marta Moreiras sobre a paisaxe no litoral galego.
As imaxes que compoñen a exposición fan unha nova lectura das vistas da costa, onde o mundo atopa o seu fin. Nelas a paisaxe vólvese territorio dando igual tratamento ao natural e ao creado polo home.
O espazo escollido polo Outono Fotográfico para que Marta Moreiras interveña, non pasará desapercibido, pois a autora crea un ambiente expositivo que xera a obriga no espectador de centrarse unicamente nas imaxes que son presentadas como luces flotantes na escuridade, illándoas así dunha contorna para crear iconas cargadas da luz típica da costa galega.
A exposición poderá visitarse até o 5 de xaneiro en horario comercial.
