A publicación é un estudio sobre a Staged Photography ou fotografía escenificada, e edítase logo do éxito acadado na exposición homónima curada por Vítor Nieves na que participaron os mesmos artistas que no libro. Pretende ser un breve resumo a modo de representación do panorama actual dese estilo fotográfico con obras meticulosamente seleccionadas de artistas de varias xeracións provintes dos diferentes países que conforman a Península Ibérica. Ás imaxes precédenlle tres textos analíticos, o primeiro de Vítor Nieves, alma máter do proxecto, o segundo de Rui Prata, o que fora durante anos director do Museu da Imagem de Braga e director do festival internacional Encontros da Imagem, e o terceiro de Marcia Luca Soutadoiro van der Säge, prestixiosa crítica de arte espacializada en artes performativas.

«As fotógrafas e fotógrafos, convértense en escenógrafos, e deixan de captar a realidade para construíla, abrindo unha grande xanela cara a ficción e poñendo en dúbida a noción mesma de realidade. A cotío, na Staged Photography, empregouse como parte primordial para compoñer a imaxe, e imprescindíbel para artellar o concepto, aos e ás modelos. Por veces, é o propio autor ou autora a que interactúa e forma parte da súa propia obra, até tendo diversos papeis, asumindo identidades ficticias, outras, son actores, actrices, ou maniquís os que, baixo a dirección do fotógrafo, interpretan papeis, normalmente relacionados coa vida social, o status, a mitoloxía ou os soños.» (extracto do texto de Vítor Nieves)

---