Miguel RIOPA

Residente en Vigo. Formado na Escola de Arte Mestre Mateo e no Centro de Estudos da Imaxe, en Santiago de Compostela. Desde o ano 1990 traballou como redactor gráfico nos xornais Xornal Diario, Diario de Pontevedra, Diario 16 de Galicia, La Voz de Galicia e El Mundo. Foi correspondente da Agencia Efe e de Associated Press. Na actualidade desenvolve a súa actividade profesional na Agence France-Presse, ademais de colaborar con varias editoriais e empresas dedicadas á comunicación empresarial. Bolseiro da Universidade Complutense de Madrid para participar nos cursos maxistrais de fotografía que se desenvolven no Escorial, asistiu a talleres impartidos por fotógrafos e editores gráficos de renome como Cristina García Rodero, Alex Webb, James Nachtwey, Christian Caujulle, Cris Steele-Perkins ou Chema Conesa, entre outros. En 2002 dirixiu o curso «Imaxe e son dixital aplicados ao xornalismo», organizado polo Colexio de Xornalistas de Galicia. En 2004 gañou o premio de fotografía Luís Ksado cunha reportaxe sobre os incendios forestais. En 2008 foi galardoado co segundo premio da categoría «Sport Features» no certame World Press Photo. www.miguelriopa.com.