Xosé Manuel OTERO

De formación autodidacta, traballa indistintamente en cor ou branco e negro, con inclinación a temas paisaxísticos ou a retratos. Ten feito exposicións individuais na Sala Fonmiñá de Lugo desde 1997, ano no que se inscribiu na Asociación Fotocinematográfica Fonmiñá. Participou nos Outonos Fotográficos de 1999 —cunha colección sobre a Ribeira Sacra que lle adquiriu o Museo Etnográfico de Ribadavia—, de 2000 e de 2003. Participou en Lugo en exposicións colectivas como «Memoria visual de Lugo» ou «A Ribeira Sacra», e máis recentemente en «Proxecto Abertal», no Museo de Lugo (2008).